Уҗымнар да сый сорый

Бүген игенчеләр өчен иң мөһиме - җирдәге дымны саклау. Шуңа күрә көнен дә, төнен дә тырмалау сорала.

- Бер кырыйдан сабан культуралары да чәчә башлау вакыты,- ди район авыл хуҗалыгы һәм азык-төлек идарәсе консультанты Рәдиф Гайнуллин. - "Кади", "Чирмешән-АГРО", "Күтәмә АГРОфирмасы" җәмгыятьләре, "Серендеев Н.И." крестьян-фермер хуҗалыклары бу эшкә дә оешкан төстә керештеләр, дым каплатуны да озакка сузмыйлар.

Районның авыл хуҗалыгы предприятиеләрендә 6400 гектарда көздән чәчелгән уҗым культуралары яхшы кышлаган. Орлыкларны минераль ашламалар белән, технологияне төгәл үтәп, чиста, пар җирләренә һәм вакытында чәчү нәтиҗәсе бу. Уҗым бодае һәм арыш участокларын хәзер кабат ашлау һәм тырмалау кирәк, юкса аннары моңа көч, вакыт калмаячак.

"Моляков В.А", "Үтәмеш", "Алга" хуҗалыкларында, "Чирмешән агрохезмәтләре" бүлекчәләрендә язгы кыр эшләренә темп җитешми, һаман оешып китә алмыйлар. Һәр эшнең - үз вакыты.