Чирмешән районында өч айда автомобиль йөртүче 148 кеше таныклыксыз калган

Район башкарма комитетының чираттагы утырышында районда юл хәрәкәте куркынычсызлыгы буенча агымдагы елның беренче кварталында башкарылган эшләргә йомгак ясалды. Шулай ук Бөек Җиңүнең 76 еллыгын бәйрәм итүгә әзерлек һәм райондагы спорт тормышы турында да мәгълүмат җиткерелде.

-ЮХИДИ бүлекчәсе хезмәткәрләре беренче кварталда юл хәрәкәте кагыйдәләрен бозуның 685 очрагы ачыклады, инспекциябез хезмәткәрләре тарафыннан кузгатылган административ эшләрне карау нәтиҗәләре буенча, судлар тарафыннан, 148 хокук бозучыга карата транспорт чарасы белән идарә итү хокукыннан мәхрүм итү турында карар чыгарылды,  - диде үзенең чыгышында ЮХИДИ бүлекчәсе начальнигы Рәмис Шәкуров. – Бу вакыт аралыгында автомобиль белән исерек килеш идарә иткән 15 кеше тоткарланды (үткән елның шул чорында – 14). Кагыйдә бозучылар арасында машина йөртү таныклыгы бөтенләй булмаган (3) һәм йөртү таныклыгыннан мәхрүм ителгән хәлдә (4) кабат руль артына утыручылар да бар. Кагыйдә бозган җәяүлеләр дә (10 очрак) җавапка тартыла.

Быел балалар катнашында юл-транспорт һәлакәтләре теркәлмәгән. Бу - “Юл хәрәкәте куркынычсызлыгы” район профилактика бүлекчәсенең ЮХИДИ хезмәткәрләре белән берлектә эшләве нәтиҗәсе.

Юллардагы чокырларны ямауны, федераль һәм төбәк автомобиль юлларында юл билгеләрен яңартуны тизләтергә кирәклеген дә искәрттеләр утырышта. Яңа уку елы башланганчы мәгариф оешмалары янындагы җәяүлеләр юлларын яңартып буярга кирәк. Чирмешәндәге Титов урамында, “Ассорти” кибете янында, 30 метр арада тортуар ясау җаен да табасы иде, юкса биредә җәяүлеләр машина юлыннан йөрергә мәҗбүр.

фото: автор