Ульяновка мәктәбеннән Николай Тимирясов олимпия юлында

Якутиядә узган олимпиаданың йомгаклау этабында Россиянең 81 төбәгеннән 300гә якын укучы катнашкан, шулар арасында 34 татарстанлы. Республика командасы яхшы нәтиҗәләр күрсәтте: дүрт укучы - җиңүче, ә 19сы призер булды. Бүләкләнүчеләр арасында райондашыбыз Николай Тимирясов та булуы куанычлы. Ул барлык сынауларны да уңышлы узып, олимпиада призерлары арасына керә.

- Николай – талантлы спортчы. Аның уңышы - шәхси җиңүе бөтен мәктәп, район һәм республика өчен горурлык, - диде район мәгариф бүлеге методисты Гөлчирә Нурисламова. – Призерның тренеры Андриян Тимирясовка да зур рәхмәт.

Олимпиада ике турдан - теория һәм практика өлешеннән тора. Балалар спорт тарихы, стройга әзерлек буенча сорауларга җавап биргәннәр, кроссвордлар чишкәннәр, аннары үзләренең физик әзерлекләрен күрсәткәннәр. Сынау программасында гимнастика, баскетбол, футбол, төрле дистанцияләргә йөгерү, шулай ук электрон винтовкадан ату һәм пычак ыргыту да булган.