Чирмешән табибы көзге чорда сезонлы авырулардан саклану киңәшләрен бирде

–Сезонлы авыруларны дәвалаганчы, аларны булдырмавың хәерле. Бу эшне ел дәвамында башкару зарур. Организмны чыныктыру өчен физик күнегүләр ясарга, саф һавада йөрергә, витаминнар кулланырга кирәк. Бу кеше сәламәтлегенә уңай йогынты ясый, – ди Юлия Ильинична.

–Сезонлы вируслы чирләр котырган чорга керәбез. Хәзер ничек сакланырга киңәш итәрсез?

–Беренче чиратта, авыручылар белән аралашмаска кирәк. Әлбәттә, витаминнар куллануны арттыру зарур. Әйтик, С витаминын эчәргә киңәш итәм. Шулай ук әлеге витаминга бай ризыкларны ашау да файдалы.

Табиблар әйтүенчә, гриппка каршы прививка ясатырга теләүчеләр булса, район үзәк больницасына мөрәҗәгать итә алалар, вакциналар җитәрлек.

Шулай ук, урамга чыкканда сезонына, һава шартларына карап киенү, өшүдән һәм үтәли җилдән саклану турында да онытмагыз. Сәламәтлегебезне саклыйк!

Саклану дигәннән, инде соңгы елларда ятлап ук бетерелгән гади генә кагыйдәләрне дә онытмагыз: гигиена кагыйдәләрен үтәү (кулларны сабынлап юу, өстәлләрне һәм башка җиһазларны дезинфекцияләү, бүлмәләрне җилләтү), чиргә каршы вакцина ясату мөһим.

Фото: Илсөяр Гайнетдинова.