Түбәләрдән карны чистартырга

Гадәттән тыш хәлләр һәм янгын куркынычсызлыгын тәэмин итү буенча район комиссиясе түбәләрне кардан чистартуны вакытында оештыру турында карар кабул итте.

Авыл җирлеге башлыкларына, предприятиеләр һәм оешмалар җитәкчеләренә биналар, күп-квартиралы торак йортлар түбәләрендә 30 сантиметрдан да калынрак кар катламы булдырмау, аларны чистартып тору бурычы куелды. Район гадәттән тыш хәлләр идарәсенә, күзәтчелек эшчәнлеге бүлеге хезмәткәрләре белән берлектә, рейд тикшерүләре үткәрү йөкләнә. Аларның нәтиҗәләре Гадәттән тыш хәлләр һәм янгын куркынычсызлыгын тәэмин итү комиссиясендә каралачак.