Чирмешән кызлары осетин пироглары пешерә

Бу конкурс мәктәп укучылары арасында үтә. Быел анда Чирмешән лицееннан Гөлинә Кәлимуллина, Алинә Мәгъсүмова, Әмирә Тәхаутдинова (укытучылары Татьяна Новичкова) камыр ризыклары пешерүдә, ә Игорь Митрюхин (укытучысы Павел Рунов) мәгълүмати технологияләр һәм  3Д модельләштерү компетенцияләрендә көч сынашканнар.

- Бәйге алдыннан без, кызлар, Чирмешән аграр техникумы  мастерлары ярдәмендә, ризыкларны пешереп карадык, аларның киңәшләрен тыңладык. Биремнәрне алдан белешкән идек. Гөлинә Казанда жюрига булкалар пешереп күрсәтте, без Әмирә белән, осетин халкы пироглары пешердек, - ди Алинә Мәгъсүмова.

Кызлар ризыкларны аларга алдан бирелгән,  рецепт язылган технологик карта нигезендә әзерләгәннәр. Алинә белән Әмирә, әйтик, төрле эчлекле (ул сыр, чия, бәрәңге, ит булырга мөмкин) алтышар пирог пешергәннәр. Моңа ике сәгать ярым вакыт бүленгән.

- Бу бәйгедә башка кызлар белән танышып кайттык, аралаштык, тәҗрибә тупладык, - ди өйдә пирожкилар, өчпочмак, бәлешләр пешерергә яратучы Алинә.    

Зөлфия Мингулова фотолары