Түбән Кәминкә авыл китапханәсендә “тормыш китабы”н укыдылар

Чарада озак еллар пар канат, бер-берсенә терәк, таяныч булып яшәүче биш пар катнашкан. Нияз һәм Сания Гайнуллиннар, Азат һәм Раухания Могыйновлар, Әмир һәм Гөлия Гарифуллиннар, Фазыйл һәм Рушания Сәлмановлар, Дамир һәм Рабига Гыйрфановлар – авылның үрнәк гаиләләре.

-Гаилә – һәркемнең тормышында мөһим фактор. Анда җаваплылык, кайгыртучанлык, бер-береңә хөрмәт кебек хисләр тәрбияләнә. Кунакларыбыз – үрнәк гаилә булып яшәүче, тәртипле балалар тәрбияләгән парлар, - диде авыл китапханәсе мөдире Зөлфия Мәссарова. – Очрашу барышында аларның тагын бик күп уңай сыйфатлары ачылды.

Чара барышында һәр пар үзләренең ничек танышулары, гаилә кору тарихы һәм тагын байтак кызыклы вакыйгалар белән таныштырдылар, гаилә традицияләре, тату гаилә серләре белән дә уртаклаштылар. Кичәдә һәркем үз сәләтен күрсәтте. Чара конкурслар белән үрелеп барды, кунакларга тапкырлыкларын, осталыкларын, уңганлыкларын, җитезлекләрен күрсәтергә дә җай чыкты.