Чирмешән районында санитар чисталыкны комиссия тикшерә

Район башкарма комитеты каршындагы административ комиссия чисталык рейдларын туктатмый. Ел башыннан район үзәгендә карны тиешсез урынга өйгән өчен 6 шәхси һәм юридик затка карата беркетмә төзелеп, гаеплеләр җавапка тартылган.

-Соңгы вакытта безгә канализация суларын урамга, бакчаларга агызучылар, карны көрәмичә, язгы кар суларын, ерып җибәрмичә, күршеләрнең торакларына, матди байлыкларына зыян салучы хуҗалар турында шикаятьләр керде, - ди административ комиссия секретаре Татьяна Якимова. -Болай бер-береңә зыян салу бер дә матур күренеш түгел, яшәү нормалары, кагыйдәләре бар бит. Халык бер-берсен хөрмәт итеп, аңлашып яшәсен иде. Ә инде мондый шикаятьләр кабатланса, чарасын күрербез. Экологлар "кулына" эләксәгез, алар да рәхмәт әйтмәс.

Үткән ел район буенча санитар-экологик чисталыкка кагылышлы 84 беркетмә төзелгән, гаеплеләргә 135 мең 500 сум штраф салынган, ирекле рәвештә һәм суд приставлары ярдәме белән дә аларны түләттереп бетергәннәр.

Көннәр җылыткач, кар астыннан байтак чүп-чар өскә чыга башлады. Һәркем үз йорт тирәсен, оешмалар үз территориясен, беркетелгән урамнарны чистартырга тиеш. Тик сау-сәламәт кешеләр үз капка төпләрендә үзләре тәртип салсын иде, кемнеңдер килеп җыештырганын көтмәсеннәр.

2017нче ел - Экология һәм табигый киңлекләр елы, шуңа күрә Татьяна Якимова әйтүенчә, чисталыкка игътибар тагын да артачак, рейдлар ешаячак. Комиссия членнары килеп беркетмә төзегәнне көтмик.