Лашман авылында Рамазан аенда ике Коръән-хафиз эшли

-Бер көнне авылда өчәр урында ифтар узган көннәр дә бар. Берсе мәчеттә булса, калганнары - өйләрдә, - диде авыл мәчете имамы Камил хәзрәт Соруртдинов. – Рамазан аенда Лашманда Самарадан һәм Казаннан ике Коръән-хафиз эшли. Тәрәвих намазларын да алар укый. Бу намазга 40-45 кеше җыела.

Табын уздыру өчен мәчеттә, үзгәртеп корылган подвалда аш-су әзерләү бүлмәсе җиһазландырылган, савыт-саба да җитәрлек. Ир-атлар һәм хатын-кызлар өчен аерым заллар. Ифтарга 100-110 кеше җыела. Залларның сыйдырышлыгы зур булгач, бер көндә берничә гаилә кушылып ифтар уздыра. Ай башыннан ук бөтен көннәрне дә бүлеп бетергәннәр.

Мәчеттә табын әзерләүчеләр бар. Гаиләләр аларга азык-төлек китерәләр яки акча бирәләр һәм алар барысын да үзләре башкара. Оештыру эшләре Гаилә апа Җиһаншинага йөкләнгән, ә пешерүне мәктәп ашханәсе пешекчеләре Миләүшә Әбүнәгыймова, Илһамия Гатауллина, Гөлҗәмилә Сарыймовалар үз өсләренә алганнар. Алар ифтарда кунакларны тәмле ризыклар белән сыйлый.

-Быел мәчеттә ифтар уздырырга теләүчеләр аеруча күп, үткән елда дин йортында тугыз көн генә табын көйләнгән иде, - диде имам. – Ураза тотучылар күп, араларында яшьләр дә булуы куанычлы. Биш вакыт намазга мәчеткә киләбез, анда 15ләп кеше җыела, ә җомгада 20-25ләп булабыз.

Сүз уңаенда, Лашман мәчетендә Рамазан ае дәвамында Коръәнне хәтем кылалар, моның өчен һәр көнне иртән дин йортына җыелалар.

Гаилә Җиһаншина фотолары