Туймәт авылыннан Хәйруллиннарны Әлмәттә дә яхшы беләләр

Рәсимә һәм Мәүлет Хәйруллиннарның кызлары Рәдифә Ногманова-Хәйруллина гаиләсе “Гаилә тарихында гасырлар кайтавазы – Тарихта без эзлебез” шәҗәрә фестиваленең Әлмәт муниципаль этабында ике нәсел-ыруны да күрсәтеп, бәйгедә җиңү яулаганнар. Якташларыбыз төрле милләтләрдән булган тугыз гаилә арасында үзләрен иң осталар итеп күрсәткәннәр.

-Без ике якка да хас булган уртак сыйфатларны сәхнә аша жюрига һәм тамашачыларга җиткердек. Ә алар бездә байтак, - диде Рәдифә Мәүлет кызы. – Бабаларыбыз – Бөек Ватан сугышы ветераннары, нәселдә гармунчылар да, җырчылар да бар, укытучы, журналист, шофер һөнәре  ияләре дә шактый. Аш-су презентациясендә нәселдән килгән кош-корт үстерү шөгылен күрсәттек, әби-бабай, әти-әни эшен хәзер без, яшьләр, дәвам итәбез.

Ногмановлар-Хәйруллиннар нәселен сәхнәдә 19 кеше тәкъдим иткән. Жюри алдына әби-бабайлар, балалар, оныклар чыккан.

 Бу нәселдә күп балалы гаиләләр аз түгел. Үзләре ишле гаиләдә үскән егет-кызлар да зур гаилә булдыра. Аннан соң төп йортта каенана, каената белән яшәү дә - алар нәселенә хас сыйфат.

Сүз уңаеннан: Әлмәттә яшәүче Илнур һәм Рәдифә Ногмановлар биш бала үстерә, инде 23 ел әниләре (каенана) белән матур гомер итәләр.

-Бәйгегә әзерлек барышында әти (Хәйруллиннар) ягыннан 12 буынны барладык, - диде Рәдифә.

- Әби-бабай төсе итеп саклана торган әйберләр дә бәяләнде бәйгедә. Гореф-гадәтләрне дә күрсәттек. Чыгышыбызны дога кылып тәмамладык.

Рәзинә Мортазина фотолары