Лашманнан 90 яшьлек Оркыя әби һинд кинолары яраткан
Лашман авылыннан Оркыя Галимовага 90 яшь тулды. Гомер буе сыер савучы булып эшләгән юбилярны район җитәкчелеге дә барып котлады.
-“Октябрьнең 50 еллыгы” колхозында әүвәл бозаулар карадым, аннан соң гел сыер саудым, алдынгы булдым, медалем дә бар. Яшьрәк чакта фермадан кайткач, клубта һинд кинолары карарга да өлгерә идек, - дип сөйли Оркыя Нуриәхмәт кызы.
Оркыя һәм Һадый (2025 елда мәрхүм) Галимовлар ике бала үстергәннәр. Юбилей үткәрүче әби бүген кызы Алсу янында – төп йортта яши. Ә туган көннең аш-суга мул табынын улы Дамир, килене Ландыш өендә көйләгәннәр.
-Безнең әни күп күрмәде, күп ишетмәде, күп белмәде, яхшы булды. Рәхмәт, балаларны үстереште, - диде каенанасы хакында килене Ландыш.
Оркыя Галимованы 90 яшьлеге белән район башкарма комитеты җитәкчесе Илнур Җамалетдинов барып тәбрикләде. Ул юбилярга район башлыгы Рамил Айбатовның котлавын һәм бүләген ирештерде.
-Аллаһыга шөкер, гомерем күңелле үтте. Балаларым карый. Этебез Малыш бар, аны мин ашатам, хайван - үзенә күрә бер юаныч әле ул, - диде Оркыя әби.
автор фотолары.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев