Күтәмәлеләр сарымсак уңышын җыя

-Уңыш начар булыр дип шикләнүләр юкка чыкты, быел сарымсаклар бик уңды, эре булып үскәннәр. Яңгыр яумагач, сугарырга туры килде, билгеле, - диде Рамилә Родионова. – Сарымсак бит ул артык дымны да яратмый, корыда үсми.

Родионовлар сарымсакны күп чәчми, үзләренә җитәрлек - ике түтәл генә. Уңган бакчачыдан аны үстерү, саклау серләре белән дә кызыксындым.

Рамилә уңышның өлгерүен белү өчен түтәлдәге берничә сарымсакның башын (стрелка) өзмичә калдыра. Менә шул чәчәге ачыла башлагач, уңышны алырга ярый.

-Сарымсакны йолкып, бәйләп, ышык урынга кибәргә куям, сабакларын бераз кыскартам. Ул көзгә кадәр шунда тора, - ди бакчачы. – Өйгә кертер алдыннан сабакларын кисәм һәм тартмаларга салып идән астына куям. Яңа уңышка кадәр ул шунда саклана. Аннан соң аның сакланышы сарымсакның өлгерүенә һәм җәен һава торышының нинди булуына да бәйле.

Якташыбыз сарымсакны көздән чәчеп калдыра, орлык алмаштырганы юк, үзенекен утырта.

Рамилә Радионова фотосы