Ишлинканың иң өлкән кешесенә 90 яшь тулды

Кадрия Гамирова, 23 август 2021 - 10:01

5206

Григорий Сырукин кунакларны капка төбенә чыгып ук каршы алды. Гади кунаклар түгел, аны 90 яшьлек юбилее белән котларга районнан ук килделәр. Район башлыгы урынбасары Гадрәшит Җамалтдинов юбилярга Россия Президенты Владимир Путин һәм район башлыгы Фердинат Дәүләтшин исеменнән котлаулар ирештерде һәм бүләк тапшырды.

Ишлинканың иң өлкән кешесенә 90 яшь тулды

Григорий Андреевичның балачагын сугыш урлый. Бөек Ватан сугышы башланганда аңа әле 10 яшь тә тулмаган була. Туган авылы Ишлинкада 3 сыйныфны тәмамлагач эшли башлый.

-Алга таба укырга мөмкинлек булмады. Әтине сугышның беренче көннәреннән үк фронтка алдылар. Аны ат белән Чирмешәнгә кадәр озатып барган әле дә хәтердә. Ул безнең соңгы очрашуыбыз булган инде, кара пичәтле кәгазь генә килде, - дип ул елларны искә алды Григорий Сырукин. – Әни дүрт бала белән калды. Тамак туйдыру өчен хуҗалык көтүе көттем.

Бүген дә нык адымнар белән басып йөрүче якташыбыз чик сакчылары гаскәрләрендә хезмәт иткән. Аннан кайткач “Восход” колхозында хезмәт куя, сарык фермасында мөдир булып эшли. Ул вакытларда авыл фермасында 5 мең баш сарык асраганнар.

Григорий Андреевич тормыш иптәше Луиза белән ике кыз үстерәләр.

-Безнең әти кешегә ачу саклый белми, ачык күңелле кеше. Безне дә шундый итеп тәрбияләделәр, - диде инде 6 ел әтисе янында яшәүче Юлия Григорьевна. – Кызганыч, бу олы бәйрәмдә кунаклар гына азрак. 10 ел элек апаны, 3 ел элек әнине җирләдек.

Бабаларын юбилей белән котларга ике оныгы һәм ике оныкчыгы да кайткан иде.