Әккәрәй авылы электрчысына – 90 яшь

Александр Андреевичны хөрмәт итеп, төп йортка, балалары, оныклары, оныкчыклары җыелган. Аны матур бәйрәме белән котларга район җитәкчелеге дә килде. Район башкарма комитеты җитәкчесенең социаль мәсьәләләр буенча урынбасары Ләйләгөл Моксинова район башлыгы Рамил Айбатовның тәбрикләүләрен ирештерде һәм бүләк тапшырды.

Якташыбыз хезмәт юлын укытучы булып башлый, соңрак нефть тармагына китә һәм пенсиягә чыкканчы шунда эшли.

-Әтиебез искиткеч кеше, алар әни белән безнең өчен янып-көеп яшәделәр, дөрес, без дә аларның ышанычларын акларга тырыштык, - ди балалары. – Әниебез Галина Васильевна гына дөньядан иртәрәк китте.

Васильевлар алты бала үстерәләр, кызганыч, бала кайгысы да кичерергә туры килә, төпчек кызларын җир куенына салалар. Юбилярның 12 оныгы, оныкчыклары да бар. Александр Андреевичның балалары төрле шәһәрләрдә яши, шулай да ул ялгыз түгел, төп йортта оныгы Надежда һәм бәләкәй оныкчыгы белән гомер итә, махсус хәрби операциядәге кияүләренең җиңү белән әйләнеп кайтуын көтәләр. Балалары әтиләре янына еш кайтып йөриләр, ярдәм итеп торалар.

Кадрия Гамирова фотолары