Туймәт турында өченче китап дөнья күрде

“Туймәтемә 280 елдан соң әйләнеп кайтам” исемле 416 битле китапны 400 данә тираж белән Казанда бастырганнар. Аның авторы Дамир Таҗиев.

Әлеге басманы әзерләүгә, мәгълүматлар туплауга берничә ел вакыт китә. Аның инициаторы һәм яздыру чыгымнарын күтәрүче дә авылдашлары - “Татойлгаз” җәмгыятенең генераль директоры Роберт Фәссахов (инде мәрхүм).

-Кызганыч, ул бу китапны әзер килеш кулына тота алмады, үткән ел арабыздан китте, - диде авыл активисты Айдар Кәримов. – Ул аны кат-кат укып төзәтмәләр дә кертте. Әтисе башлаган эшне улы тәмамлады - китапны бастыру чыгымнарын улы Эдуард Фәссахов үз өстенә алды.

 Кадыйр Гомәров фотолары