Лагерка авылына керү юлын быел төзеп бетерәчәкләр

Лагерка авылы мәктәбендә 11 укучыга 8 укытучы белем бирә, тагын 8 хезмәткәр эшли. Авылда мәктәпкәчә яшьтә алты сабый бар, ә бакча юк.

-Бу кадәр бала белән бакча ачу мөмкин түгел, бәлки Шешминкадагы балалар бакчасын эшләтеп җибәреп, бу авыл җирлеге балаларын да шунда йөртүне оештырыргадыр, - диде җыенда катнашкан  район башлыгы Рамил Айбатов. – Елдан-ел кеше саны азайган авылларда яңа объектлар ачып булмый, мин күп функцияле үзәкләр оештыру яклы.

Җирлеккә керүче өч авылда (Мордва Афонькәсе, Лагерка, Чуваш Афонькәсе) 211 йортта 373 кеше яши: Лагеркада – 249, Мордва Афонькәсендә – 74, Чуваш Афонькәсендә - 50. Төп халык чувашлар – 279, мордвалар – 75, руслар – 17, татарлар – 2. Быел җирлектә ике сабый туган, 11 кеше бакыйлыкка күчкән.

Мордва Афонькәсендә модульле фельдшер-акушерлык эшли, быел Лагеркада да шундый ФАП бинасы төзергә планлаштырыла. Ике авыл халкына да райпо кибетләре хезмәт күрсәтә.

-Авыл җирлегендәге юлларның озынлыгы тугыз километрдан күбрәк. Шуның 3,12 километры асфальтланган, тагын шул кадәренә вак таш түшәлгән, өч киломерга якын өлеше юлчылар көтә, - диде Мордва Афонькәсе башлыгы Александр Митяев. – Мөмкинлек булу белән ул юлларны да норматив хәлгә китерергә тырышабыз. Быел Лагерка авылына алып керүче юлның калган өлешен ясап бетерү дә планлаштырыла.

Җыен ахырында 50-55 ел гомер иткән парларны, 4-8 баш савым сыеры асраучы шәхси хуҗалыкларны, авыл тормышында актив катнашкан авылдашларны, “Яңа елга йортларын иң матур бизәүче” һәм “Иң төзек йорт тирәсе” номинациясе җиңүчеләрен бүләкләделәр.

ФОТОРЕПОРТАЖ