Кыраулар Иске Үтәмештә агач-куакларны каралткан

Мондый хәлне күргән юк иде

Иске Үтәмештә салкынлык 10 градуска ук җиткән, диләр.

- Алмагачлар шау чәчәктә иде, яфрагы да күренмәде. Балаларга фотога төшереп калыгыз, дидем, бигрәк матур бит, икенче көнне кыраудан соң шушы чәчәкләр кап-кара булды. Кызганып, утырып еладым хәтта, - ди Иске Үтәмештән  Рузалия Мингулова. - Миңа хәзер 72 яшь. Шул яшемә җитеп андый хәлне күргәнем булмады. Сабан туйлары алдыннан бер салкынайтып алгалый, тик моның кадәр үк булмый иде инде. Быел утырткан чәчәкләребез дә кап-кара.

- Помидорлар ничек?

- Аларны күчермәгән идем әле, тармаларында килеш өйгә кертеп өлгердем. Күршеләр суганнарын бик иртә чәчкән иделәр, түтәлләре шулай ук кап-кара. Әле ялкаулык та ярый икән, мин әйтәм, минекеләр чыгып кына килә, - дип шаяртып алды бакчачы.

Аларның йорты  су буенда, түбәнлектә урнашкан. Шунлыктан кырау монда ныграк “усалланган”.

- Табигать әллә нишләде быел. Апрель башыннан нык җылытты. Кайбер яшелчәләрне ашыгып чәчтек, ашыкмасаң – үсми, яңгыр юк. Аптырый торган.

Редакциядә эшләүче хезмәттәшебез Гөлнара - Рузалия апаларның күршесе.

- Безнең дә алмагачлар өметсез, карлыганнар, чәчәкләр, редиска, укроп, тәмләткеч үләннәр утырткан идем – барысы да каралды.  Кызык кына, ул тәмләткеч үләннәрне суыткычта кышка туңдырабыз  - каралмый, яшел килеш тора, ә монда кырау менә шулай итеп ташлады. Суыкларда хәтта өрәңге агачлары, кура җиләкләре яфраклары да зәгыйфьләнеп калган, - ди ул да.

Борчаклар терелерме?

Район авыл хуҗалыгы һәм азык-төлек идарәсе консультанты Рауфан Шәйхетдинов әйтүенчә, 7 градуска җиткән салкыннар “ЧИРМЕШӘНАГРО”да  чама белән 200 гектарда, “БИО-АГРО”да 70 гектардан күбрәк мәйданда  борчак үсентеләренә зыян салган.

- Алар саргайган, өч-дүрт көн көтеп карыйбыз, бәлки терелеп китәрләр. Кырау “Ильхан” җәмгыятендә  яхшы сортлы  люцерна басуын куырып өлгергән, “ЧИРМЕШӘНАГРО”да  400 гектарлап мәйдандагы горчица кырын, “БИО-АГРО” җәмгыятенең Андреевка авылы ягындагы  270 гектарда рапсын саргайткан  - ди Рауфан Шәрип улы.

Гомумән, агроном әйтүенчә, быел яңа чәчкән культуралар хәл алып китә алмый, авыр чыга, сыеклар: яңгыр кирәк.

- Иске Котыш, Иске Элмәле авыллары янындагы кырларга бераз яңгыр эләкте, чәчкәннәр шунлыктан тигез булып рәт ярды. Уҗымнар да яхшы ул якта. Интернет киләсе ялларга явым-төшем бирә, шуны көтәбез, яңгыр бик кирәк.   

Гөлнара Азоркина һәм Руслам Хәлиуллин фотолары