Иске Кадидан Хисамовларда үткән каз өмәсенә гармунчы да дәшкәннәр

-Өмәчеләрем бик осталар, сөйләшеп, җырлашып, бик күңелле итеп эшлиләр. Алай да хезмәтебез көн буена диярлек сузылды. Вак эш бит, - диде хуҗабикә Әлфия Хисамова.

Әлфия ханым быел 70 баш каз үстергән, бүген җыйнаулашып шуларның 16сын эшкәрттеләр.

-Берүзең генә эшләп булмый. Балаларым, авылдашларым булыша, - ди хуҗабикә.

Хисамовлар казлардан кала, 50 баш үрдәк, 25 бройлер үстергән. Сыерлары, таналары бар.

...Казлар йолкынып, эчләре алынып, аяк-башлары чистартылып бетте. Өмәче хатын-кызлар түшкәләрне салкын суда юдылар. Ә өйдә каз эч-башларыннан пешерелгән бәрәңге бәлеше исе таралды. Түргә самавар менеп утырды. Табында уен-көлке, җыр башланды.

-Уйнамагач та, көлмәгәч,

Бу дөнья нигә ярый,  дип күңел ачып, җырлашып утырды Иске Кади уңганнары табында.

Ә җыр, тапкыр сүз тирәсендә осталар инде искекадилылар. Гармунчылары да шунда гына: Оркыя Нуретдинованың белмәгән җыры, көе юк бугай.

Каз өмәсе ул – матур итеп аралашу, күңел ачу, үзеңне күрсәтү бәйрәме.

ФОТОРЕПОРТАЖ 

Марат Гомәров фотолары