Чирмешәннең “Кояшлы” лагеренда Суворов училищесы хезмәткәрләре дә эшләячәк

Гадәттәгечә, җәйге каникул чорында дүрт смена эшләячәк. Беренче һәм икенче сменаларда ял итәргә теләүчеләрнең ата-аналарыннан гаризалар кабул итә башлаганнар, инде буш урыннар азаеп бара.

Яңа сезонга әзерлек дәвам иттерелә, лагерьның матди-техник базасы яңартыла. Мендәрләр, одеаллар, сөлгеләр, савыт-саба, зур экранлы интерактив такта, спорт инвентарьләре сатып алынган. Душ һәм юыну бүлмәләрендә җиһазлар алмаштырыла, отряд биналарында ремонт эшләре башкарыла.

-Быел беренче сменаны Әфган сугышлары ветераннары җәмгыятенең “Шторм-2” иҗтимагый оешмасы катнашында оештырырга планлыйбыз, - диде лагерь директоры Җәүдәт Мотыйгуллин. – Монда смена начальнигы, физкультура буенча вожатый-инструкторлар Казан шәһәренең Суворов училищесыннан киләчәк.

Әлеге патриотик сменада физик әзерлеккә, туристлык ориентлашуга (марш-бросок), автомат сүтеп җыюга, турникта тартылуга, граната ташлау күнекмәләренә басым ясалачак һәм ГТО нормалары тапшырылачак. Ял итүчеләрне өс һәм баш киемнәре белән дә тәэмин итү мөмкинлеге булачак.

Кадрия Гамирова фотосы.