Чирмешәнлеләр паспорт тапшыру тантанасына гаиләләре белән килделәр

Шушы рәвешле алар РФ гражданнары булуларын раслаучы дәүләт символына - паспортка ия булдылар.

Төп документларны район башлыгы урынбасары Надежда Гомәрова тапшырды һәм бу мөһим вакыйга белән укучыларны һәм аларның ата-аналарын котлады.

- Паспорт - кеше тормышында әһәмиятле һәм төп документ, - диде Надежда Габдрәшит кызы. - Ватанны яратыгыз, аның кануннарын хөрмәт итегез һәм гражданин буларак үзегезнең бурычларны төгәл үтәгез.

Тантанада катнашкан яшьләр һәм аларның гаиләләре өчен бу бер бәйрәм булды: истәлеккә фотога төштеләр, бүләкләр дә алдылар.

- Кызыбыз Илнарага паспорт тапшыру тантанасына гаилә белән килдек. Кызыбыз инде зур үсте, ничектер, дулкынландыра, - ди Илнараның әнисе Гөлинә Галәүтдинова.

Самира Гафиева да бу көнне түземсезләнеп көткән.

- Хәзер инде мин җәйге каникул чорында эшкә урнаша алам, шулай ук үзем кылган һәр эш өчен үземә җавап тотарга туры киләчәген дә беләм, - диде ул.

ФОТОРЕПОРТАЖ 

Кадрия Гамирова фотолары