Чирмешән районыннан гуманитар ярдәмнең чираттагы партиясен озаттылар

Соңгы ике айда гына да районда халык ярдәме белән 502 мең сум акча җыелган.

- Мобилизацияләнгән гражданнарга гуманитар ярдәм җыюда райондашларыбыз актив каташа. “Ярдәм янәшә” акциясе кысаларында район мәдәният йортында игелек ярминкәсе оештырылды, хәйрия концертлары узды. Моннан тыш оешмалар һәм аерым кешеләр дә акчалата булыштылар, - ди гуманитар ярдәм җыю координаторы  Рәсим Шәрифуллин.

Әлеге средстволарга, хәрби операциядә катнашучы егетләр соравы буенча, дарулар, киемнәр, газ баллонары, шәхси гигиена  әйберләре, азык-төлек һәм башка кирәк-ярак сатып алганнар. Махсус операция зонасына чирмешәнлеләр тагын ике җиңел автомобиль дә җибәргәннәр.

- Әлеге игелекле эштә катнашкан һәр кешегә рәхмәтебезне җиткерәбез, - ди Рәсим Шәрифуллин. – Аеруча шәхси эшмәкәрләр: Гүзәл Шәйхетдиновага, Булат Латыйповка, Зәкәрия Гайфетдиновка, Сергей Плехановка олы рәхмәт.

Гуманитар ярдәм җыю дәвам итә. Изге эшкә үз өлешен кертергә теләүчеләр өчен контактлар:

8-927-457-17-80 (Лилия Кәлимуллина, муниципаль район Советы бухгалтеры, “тере” акча җыю өчен җаваплы).

Акча күчерү өчен карта реквизитлары: 2200 5301 5306 7913  (Венера Ш).

Медикаментлар, җылы кием, азык-төлек һәм башка кирәк-ярак җыю пункты итеп “Орион” яшьләр үзәге билгеләнгән.

Чат “СВОих не бросаем”  Телеграмда  https://t.me/+ikYqLGFOAixhOGNi

Рәсим Шәрифуллин фотолары