Чирмешән районында күп балалы гаиләләр тораклы була

Урманасты Үтәмеш авылыннан Гөлия Сабировага Татарстан Республикасы Министрлар Кабинетының "Торак шартларын яхшыртуга мохтаҗ күп балалы гаиләләрне торак белән тәэмин итү буенча өстәмә чаралар турында"гы карары нигезендә торак алуга сертификат тапшырдылар. Әлеге документ гомуми мәйданы 90,18 квадрат метр булган йорт сатып алу хокукын раслый. 9 бала анасы 2012 елдан бирле чиратта торган.

Чирмешәннән Эльвера Шарапова исә авыл җирлегендә торак төзелешенә социаль түләү бирү турындагы таныклык иясе булды. Бу документ Эльвера Мансур кызының Россия Федерациясенең “Авыл территорияләрен комплекслы үстерү” дәүләт программасы кысаларында торак шартларын яхшырту чараларында катнашуын раслый. Дүрт балалы бу гаиләгә программа нигезендә 2 миллион 152 мең 656 сум күләмендә социаль түләү бирәләр.