Чирмешәндә чисталык өмәләре башлана

Икеайлык барышында чисталык өмәләре ешрак оештырылачак. Торак пунктларда һәм район үзәгендә санитар чисталык буенча икеайлык уздыру, эш барышын контрольдә тоту өчен район башкарма комитеты каршында оператив штаб төзелде.

Айлык дәвамында парк-скверларны, урамнарны, оешмалар территорияләрен яшелләндерү максатында агач-куаклар утырту, корыганнарын кисү планлаштырыла. Яшелләндерү эшендә мәктәп укучылары да булышачак. “Чирмешән урман хуҗалыгы”на утырту материаллары белән тәэмин итү бурычы йөкләнде. Санитар-экологик икеайлык барышында юллар һәм тротуарларны ремонтлау, янып чыккан урам яктырткычларын алмаштыру, аларның терәк баганаларын агарту, биналар тирәсендәге чүп-чарны тиешле урыннарга чыгару, косметик ремонт уздыру, санкцияләнмәгән, рөхсәт ителмәгән чүп түгү урыннарын ачыклап юк итү, балалар мәйданчыкларын, зиратларны чистарту һәм төзекләндерү, оешмалар тирәсендәге коймаларны буяу күздә тотыла.

Торак пунктларны чистартуга, өмәләргә хезмәт коллективларын һәм мәктәп укучыларын да җәлеп итү бурычы куелды.

Икеайлык барышында һәм өмәләр вакытында “ГРИНТА” җәмгыятенә тупланган чүп-чарны каты көнкүреш калдыклары полигонына чыгаруны оештыру бурычы йөкләнә.

Икеайлык барышында торак пунктларга чисталык рейдлары да ешрак оештырылачак.

фото: автор