1 нче Чирмешән мәктәбенең ашханәсе зурайган

-Ашханәбез бөтен стандартларга туры китерелеп эшләнә, пешекчеләргә дә, укучыларга да шартлар яхшыра, - ди мәктәп директоры Ләйләгөл Моксинова. – Азык-төлек әзерләү өлешендә аерым цехлар ясадылар, аш залын да зурайтырга җай табылды, хәзер монда бер үк вакытта 180 укучы утырып ашый алачак.

Биредә электүткәргечләр, җылылык торбалары, эчке өлештә су һәм канализация челтәрләре дә яңартылган. Стеналар штукатурланган, азык-төлек әзерләү өлешендә плитәләр ябыштырылган, аш залындагы стена буялачак. Идәнгә плитәләр җәю дә ахырына якынлаша. Ремонт эшләре тәмамлангач, осталар яңа җиһазлар урнаштырачак. Инде плитәләр, суыткычлар, азык кыздыру, камыр ризыклары пешерү өчен дә аерым шкафлар һәм башка шундый җиһазлар кайтарылган. Яңа вентиляция системасы да ясалачак.

Әлеге эшләргә республика бюджетыннан 8 миллион сумнан күбрәк акча бүленгән.

Ләйләгөл Моксинова фотолары.