Чирмешән сунарчылары язгы ау сезонына әзерләнә

Алай да аерым кошларны аулау өчен конкрет вакыт аралыгы билгеләнә. Кайберләренә бик кыска, бары ун көн генә. Безнең якларда яшәүче кыр казларын һәм ата кыр үрдәкләрен 15 апрельдән 24 апрельгә кадәр ауларга була. 22 апрельдән 1 майга кадәр ау мылтыгы көпшәсен урман шөлдиләренә (лесной кулик) төбәргә рөхсәт ителә.

- Язгы ауның үзенчәлеге бар, аучылар ышык урыннан, шалаштан гына атарга тиешләр, - диде ТР Биологик ресурслар буенча дәүләт комитетының Чирмешән районы буенча бүлек начальнигы Фәрит Мәгъсумов. – Безнең районда 200дә күбрәк аучы исәпләнсә дә, язгы сезонга сунарчылыкка рөхсәт алучылар күп түгел – 50-60 кына. Төлкеләр санын көйләү максатында аучылык хуҗалыгы хезмәткәрләренә аларны аулауга рәхсәт бирелә.

Татарстан Республикасы Биологик ресурслар буенча дәүләт комитетының Чирмешән районара бүлеге үләннәрне яндырырга ярамавы турында да кисәтә. Утта коры үләндә яки туфрак өстендә яшәүче җәнлекләр (куян, керпе, җир-су хайваннары) һәлак була, сирәк очрый торган кошларның оялары юк ителә. Ул урман янгыннарына да китерергә мөмкин. Ут белән сак булыгыз һәм табигатьне саклагыз!

Фәрит Мәгъсумов фотолары