Үзенчәлекле балаларга Кыш бабай бүләкләр алып килде

Дөрес, район мәдәният йортында оештырылган чарага барысы да килә алмаган: һава шартлары бераз комачаулады, сезонлы авыруларның да көчәйгән вакыты.

Чирмешәннән Антон Перцев бәйрәмдә әнисе белән. Антон Лашман мәктәбенең 5 нче коррекцион сыйныфында укый.

- Улыбыз тумыштан авырганлыктан, безгә еш кына больницаларда ятарга туры килә. Шуңа күрә Антон мондый бәйрәмнәргә бик яратып йөри, балалар белән аралашу, күңел ачу аңа уңай йогынты ясый, күңелендә матур истәлекләр кала. Рәхмәт, безнең балаларны шулай сөендергәннәре өчен. Алар шат булгач, безгә – ата-аналарга икеләтә күңелле, - диде Галина Перцева.

Бәйрәмгә Убырлы карчык, Куян, Аждаһа, Кыш бабай белән Кар кызы кебек әкияти персонажлар да килгәч,  тантана тагын да җанланып китте. Әлбәттә, балаларга район башлыгы Рамил Айбатов исеменнән татлы бүләкләр дә өләштеләр.

Ирина Митяева фотолары