Түбән Кармалкадан ветеран Мордвиновка Президент котлавын тапшырдылар

автор, 16 июль 2016 - 04:09

4708

20 яшьлек Түбән Кармалка егетен похоронная команда, Варшава янындарак, үлгән дип, чак кына тереләй җирләп куймый. Ярый әле, авыр яраланган, аңсыз минометчының ыңгырашуын бер санитар очраклы гына ишетеп ала. Исән икән ул!.. Биргән бит Ходай гомерне, снаряд кыйпылчыгы эләгеп, әнә шулай чүт кенә үлемнән калган Александр Мордвиновка зур сугыштан исән...

Биргән бит Ходай гомерне, снаряд кыйпылчыгы эләгеп, әнә шулай чүт кенә үлемнән калган Александр Мордвиновка зур сугыштан исән калырга насыйп булган. Уң яктан күкрәген, кулын ярты еллап госпитальдә дәвалаганнан соң, 1945нең январендә кайта ул туган авылына. Фронтка 18 яшендә алганнар. Инде менә шушы көннәрдә аңа 90 тулды.

Бөек Ватан сугышы ветераны үз заманында колхозда бригадир булып эшли. Умарталар карый. Хатыны Валентина Григорьевна белән биш бала үстергәннәр.

-Без Советлар Союзының миллионлаган гаиләләренең берсендә үсеп тәрбияләндек. Балалар әти-әнисе исән вакытта бәхетле була, диләр. Безнең әтиебез дә, әниебез дә, шөкер, исән-саулар, - диделәр балалары әтиләренең туган көне уңаеннан төп йортта көйләнгән табында.

Фронтовикның туган көненә Яр Чаллы, Әлмәт шәһәрләрендә яшәүче балалары , оныклары кайткан. Биш баладан 17 оныгы, 15 оныкчыгы бар Мордвиновларның. Инде олыгайдылар, үзләренә генә кыен дип, балалары әти-әниләрен кышка Чаллыга алып китмәкче. Анда фронтовикның дәүләт программасы буенча бирелгән бер бүлмәле фатиры бар.

Александр Мордвиновка Мәскәүдән Президент Путин котлавы да килгән. Аны һәм Чирмешән муниципаль районы җитәкчесе тәбрикләвен юбилярга район башлыгы урынбасары Миләүшә Батыршина тапшырды. Ветеранны әлеге авылдан район Советы депутаты, "Татнефтедор" җәмгыятенең райондагы филиалы җитәкчесе Дамир Мәгъсүмов, район хәрби комиссары Дмитрий Палаткин да тәбрикләделәр. Александр бабайга авылдагы кодагые кышка җылы оекбашлар бәйләп бирермен, дип вәгъдә итте. Анысын да киеп туздырырга насыйп булсын.