Чирмешәндә балалар өчен күңелле бәйрәм оештырдылар

Кичке буйда оештырылган бәйрәмгә чирмешәнлеләр генә түгел, авыллардан да балалар килгәннәр.

Бәйрәм кунакларын район башкарма комитетының социаль мәсьәләләр буенча урынбасары Ләйләгөл Моксинова сәламләде.

-Балалар – тормышыбызның яме, мәгънәсе. Сезгә бәхетле балачак телим. Җәйге ялыгыз күңелле үтсен, - диде ул.

Әлеге чарада районда яшәгән һәм эшләгән, быел сабыйлары дөньяга килгән гаиләләрне 30 мең сумлык сертификат белән бүләкләделәр. Менә алар: Әккәрәйдән Раиса һәм Вячеслав Макаровлар, Керкәледән Мохинур Хушиева, Чирмешәннән Эльвина һәм Илнур Сәлаховлар, Карина һәм Альмир Харисовлар, Гөлнара һәм Евгений Черновлар.

-Сабыебыз Ленар 7 майда туды, абыйсына биш яшь, апасына яшь тә дүрт ай. Безне шулай хөрмәтләгәннәренә бик сөендек, рәхмәт район җитәкчелегенә, - диде яшь әни Эльвина Сәлахова.

Бәйрәмдә шулай ук “Йолдызлык-Созвездие” иҗат фестивалендә уңышлы чыгыш ясаган балаларны да бүләкләделәр. Районның сәләтле балалары катнашындагы бәйрәм концерты да күпләрнең кәефен күтәрде. Дөрес, көне генә бераз салкынча туры килде.

-Өстән сибәләп торган яңгыр да балаларның күңелен төшерми, Күрегез, ничек рәхәтләнеп ял итәләр, бииләр, җырчыларга кушылып җырлыйлар да, - диде бәйрәмгә кызы Сөмбел белән килгән чирмешәнле Гөлфия Нуруллина. – Рәхмәт оештыручыларга, бәйрәм бик күңелле үтә.

Балалар өчен гадәттәгечә интерактив мәйданчыклар да эшләде. “Яшьтәш” яшүсмерләр клубы, үзәк китапханә, социаль яклау бүлеге, район газ хезмәте, “Беренчеләр хәрәкәте” бүлекчәсе - барысы да мастер-класслар, уеннар оештырдылар, балаларны бүләкләр белән сөендерделәр. Теләүчеләр татлы мамык, попкорн, лимонад кебек тәм-томнар белән дә сыйлана алды.

Чараның ахырында барысы да түземсезләнеп көткән күбекле шоу булды. Балаларны хәтта кичке салкын да туктатмады: барысы да диярлек рәхәтләнеп күбеккә чумдылар, бәйрәмнән күтәренке кәеф белән таралыштылар.

ФОТОРЕПОРТАЖ