Чирмешәндә өлкәннәрне ресторанга чакырып сыйладылар

Гөлсирә Шәрифуллина, 29 сентябрь 2021 - 14:29

4886

Өлкәннәр көне алдыннан Чирмешәндә олы яшьтәге якташларыбыз өчен бәйрәм оештырдылар.

Чирмешәндә өлкәннәрне ресторанга чакырып сыйладылар

Төрле авылларда яшәүче әбиләрне, бабайларны “Арарат” кафесына чакырып сыйладылар, күңелләрен күрделәр.

Әлеге бәйрәм мәҗлесен районның инвалидлар оешмасы оештырды.

-Без бүген, нигездә, ялгыз яшәүче райондашларыбызны чакырдык, - ди инвалидлар оешмасы рәисе Мәдинә Талипова. –Андыйлар аеруча игътибарга мохтаҗ.

Район мәдәният йорты хезмәткәрләре кунаклар өчен эчтәлекле программа әзерләгәннәр. Уеннар җыр-биюләр белән үрелеп барды.

-Бик күңелле утырабыз. Бәйрәмгә чакырганнары өчен, Алланың изге рәхмәте яусын, - ди Бәркәтәдән 87 яшьлек Минәхмәт Сибгатуллин. – Хәзер бит тормышларыбыз матур, пенсияне өйгә китереп бирәләр, кибеттә күңелен нәрсә тели, бар да бар. Хөкүмәтебез картларны гел кайгырта.