Чирмешәнлеләрнең җиләк, кыярлары өлгергән

Рәмзия Вилданова (Утыз Имән авылы): - Май суыкларында яшелчәләрнең үсүе тоткарланса да, кызу көннәр башлангач, бик матур күтәрелеп киттеләр. Инде ун көнләп үзебезнең кыярны ашыйбыз, күпләп өлгерә, күчтәнәчкә дә биреп җибәрдек. Теплицаның бер ягында - кыяр, икенчесендә помидор үсә. Томатларны ачык грунтка да утыртабыз, алар помидорлана башлады. Бакча җиләкләре дә өлгерде, инде чиләкләп җыябыз, компот ясадым.

Людмила Тимохина (Шешминка авылы): - Язгы салкыннар виноградларны, бакча җиләкләрен дә бераз өшеткән иде, тик чәчәкләре сакланган. Җиләкләр өлгерде, виноградның да бөреләре бар. Кыяр, помидорлар  да исәеп китте. Кыяр әле юк, тик озак көттермәс, озакламый үзебезнең уңышны ашарбыз. Безнең теплицада тамчылап су сибү көйләнгән, андага яшелчәләрнең төпләре гел дымланып тора. Суган, сарымсакларга дым җитәрлек, башка яшелчәләр дә яхшы үсә.

Айгөл Кәримова (Чирмешән): - Кыяр, помидорланы кыраулар беткәч кенә ачык грунтка чыгардым, чәчәктә утыралар. Чөгендер, кабак та бик матур үсә. Быел кишер сирәк чыкты, икенче катка да чәчтем, әле алары күренми. Соңгы көннәрдә суган түтәле саргая башлады, тозлы су да сибеп карадым. Бәлки киңәш бирүче булыр.

Лидия Квакова (Әккәрәй авылы): - Май ахырында беренче кыярларны өздек. Бу яшелчәне иртә чәчтек, суыкларда теплицага җылыткыч та куйдык. Томатлар да помидорлана. Бакчадагы яшелчәләр, әлегегә матур үсәләр, тик җирдә дым аз, яңгырлар кирәк.

Зөлфирә Сафина (Иске Кади авылы): - Быел ел матур килде, яңгырлар да явып тора, җылысы да җитә. Чөгендер, кишер, бәрәңгеләр бик яхшы үсә. Кыяр помидорлар ачык һавада гына булгач, соңрак утырттык, әлегә өлгермәде. Бакча җиләген ашыйбыз, кышкылыкка, блендер белән изеп, туңдыргычка салам.

Марат Гомәров фотолары