Быел Чирмешән районы хуҗалыкларында көнбагыш басуларын арттырмакчылар

Гомумән, райондагы 71 295 гектар сөрүлек җирнең 52 947 гектарында язгы һәм көзге культуралар урын ала. Шуның 10 454 гектарына көзге культуралар чәчелгән, ә язгы чәчү 40 012 гектарда башкарылачак.

-Быел районда беренче тапкыр көзге рапс һәм арпа игелә. Алар “БИО-АГРО”, “ЧИРМЕШӘНАГРО”, “Ильхан” җәмгыятьләре басуларында урын алды, - диде “Россельхозцентр”ның район бүлеге җитәкчесе Фәнил Шәйхетдинов. - Шулай ук быел көнбагыш басулары арта: аларның мәйданы 12 694 гектарга җитәчәк. Ә язгы бодай мәйданы, киресенчә, сизелерлек кими: узган елгы 10 мең урынына 3 908 гектарга гына кала.

Арпа - 8 518, солы 2 165 гектарда игеләчәк. Шул ук вакытта “БИО-АГРО” хуҗалыгы язгы бодай һәм арпадан баш тартып, көнбагыш, рапс, җитен һәм көзге культураларга өстенлек бирә.

Кукуруз, нигездә, мал асраучы хуҗалыкларда - “Ильхан”да һәм “Әккәрәй”дә үстереләчәк. Берьеллык үләннәр 1 165 гектарда чәчелә, алар “Ильхан”, “Сөлчә” һәм кайбер крестьян-фермер хуҗалыклары кырларында үсәчәк. Ә 18 348 гектар җир парга калдырыла, ягъни ял итәчәк.

Язгы чәчү кампаниясен үткәрү өчен районга якынча 4 мең тонна орлык кирәк. Аларның күпчелеге язгы тикшерү узган инде.

-“ЧИРМЕШӘНАГРО”, “Сөлчә”, шулай ук “Гатин Д.М.”, “Миронов Л.Н.”, “Тепсуркаев В.Ә.” кебек фермерлар бу мәсьәләгә җаваплы карый. Тикшерүләр күрсәткәнчә, орлыкларның барысы да кондицияле, - диде Фәнил Шәрипҗан улы. - “Ильхан”, “Әккәрәй”, “Кара Чишмә” хуҗалыклары, “Камалова Р.И.” крестьян-фермер хуҗалыгы да орлыкларны яңарту, репродукцияле сортларга күчү буенча эшли эшли.

Белгечләр орлыкларның сыйфатын - тишелешен, дымлылыгын, чисталыгын, корткычлар белән зарарлану-зарарланмавын тикшерә һәм хуҗалыкларга киңәшләр бирә.