Тәмле ит арзан булмый

Район үзәгендә үткән якшәмбедә оештырылган ярминкәдә иң күп тәкъдим ителгән товар орлык суганы булгандыр. Нәкъ бу көннәрдә чәчелүче, инде чәчү сроклары азаючы орлыкның килосын 50 - 70 сумга да саттылар.

Сәүдәгәрләр азрак кебек тоелса да, рәтләрдә йөрүчеләр шактый. Сыер ите кыйммәтләнгән икән, аның килосына - 240, дуңгызныкына 175 сум сорыйлар. Яңа суелган, майлы итне алалар үзе. Помидорга, кыярга да бәя төшми әле.

Берәү бройлер чебешләрен, икенчеләр бозауларын тиз урнаштырды. 5 - 6 айлык бозау - 20 меңгә, ә бер айлыгы 12 мең сумга "тарта".

Бу ярминкәдә чәчәк, азык чөгендере орлыклары яхшы үтте. Килограммын 10 - 12 сумнан бәрәңге дә саттылар. Әллә ничә кеше алмагач үсентесе кирәксенеп килгән, тик аны сатучы күренмәде.

- Оештыручыларга рәхмәт, кешедән ишеткәнче, ярминкәне үзең килеп күрү кызык инде, - ди бер ветеран абзый. - Бу чара алдагы бәйрәмнәрдә дә булсын иде.