Авыл мәктәпләрендә җылы бәдрәфләр ясыйлар

Быел Иске Котыш һәм Утыз Имән мәктәпләрендә дә "Каршылыксыз мохит" программасы нигезендә зур ремонт булачак.

Район мәгариф бүлеге җитәкчесе Хаммәткамил Хәкимов әйтүенчә, бу мәктәпләрдә 2 миллион сумга якын бәяле эш күләме планлаштырылган. Бинага керү зонасында үзгәрешләр булачак, физик мөмкинлекләре чикле балалар өчен дә аерым бәдрәф ясалачак.

Сүз уңаеннан, әлеге программа кысаларында узган елны Ульяновка урта мәктәбендә шундыйрак ремонт үткәрелде. Дөрес, мәктәп дирекциясе төзүчеләр эшеннән канәгать булмыйча, эш сыйфатына дәгъва белдергән иде. Узган ел ахырында төзүчеләр мәктәпкә кабат килеп, җитешсезлекләрне бетергәннәр. Бүген балалар бина эчендәге санузеллардан файдаланалар.