Фонтанда ... ботинка юган

Район үзәгендәге "Юбилейный" мәйданындагы фонтанга бер ай элек кенә ремонт үткәрелгән иде. Күптән түгел генә биредә 3 мең 700 сумлык су насосын һәм өч яктырткычны ватканнар.

Гомумән, бу "һөҗүмнән" 9 мең 350 сумлык зыян килгән.

Полиция хезмәткәрләре өч тәүлек дигәндә тәртип бозучыны ачыклаганнар да. Чирмешәндә яшәүче, 1965нче елда туган ир - ат үз гаебен таныган. Ул исерек килеш фонтанга кереп, аяк киемнәрен юмакчы булган...

Хәзер инде чисталыкка битараф булмаучы бу тәртипсез кешегә китергән зыянны үз кесәсеннән капларга һәм штраф та түләргә туры киләчәк.