Ивашкино авылыннан Николай Романовский капкынына селәүсен эләккән

55 ел элек

 “Алга” колхозының (Кармыш) 1 класслы терлекчесе Гаҗилә Шиһапова төркемендәге сарыклар узган ел 107 бәрән китергәннәр. Бу сарык үрчетүчеләр арасында иң югары күрсәткеч.

“Ленин юлында” – 5 декабрь, 1969 ел.

Районның техник паркы тулылана. Шушы көннәрдә “Авыл хуҗалыгы техникасы” район бүлекчәсенә “Т-16” маркалы дүрт трактор кайтты. Аларны “Красный Октябрь” (Чирмешән), “Победа” (Туймәт), Киров (Утыз Имән) һәм Чапаев (Иске Котыш) исемендәге колхозларга бирделәр.

“Ленин юлында” – 12 декабрь, 1969 ел.

Закир Сәгыйров хөрмәтенә (XXII партсъезд исемендәге колхоз, Иске Үтәмеш) район үзәгендә берничә тапкыр Мактау Йолдызы кабынды. Ул ике комбайнга хезмәт күрсәтә. 576 гектардан 11091 центнер ашлык суктырып, көнлек норманы арттырып үтәгән.

“Ленин юлында” – 13 декабрь, 1969 ел.

Акча-кием лотереясе халык арасында киң таралыш алды. Отышлар арасында автомобильләр дә бар. Әйтик, Туймәт авылыннан Фәрәз Газизуллин лотереягә “Запорожец” отты.

“Ленин юлында” – 20 декабрь, 1969 ел.

Декабрь башында булган хәл. Укучылар елгага тимераякта шуарга чыккач, кинәт елаган тавыш ишетәләр. Алар 4 яшьлек баланың суга төшеп киткәнлеген күрәләр. 7 нче сыйныф укучысы Инзил Әгъзамов батучыга ярдәмгә ташлана. Кыю пионер Зәки Гарифуллин гаиләсенә зур шатлык китерде. Мәктәп дирекциясе коткаручыга рәхмәт белдерде һәм кыйммәтле бүләк тапшырды.

“Ленин юлында” – 27 декабрь, 1969 ел.

50 ел элек

Фрунзе исемендәге колхозның (Ивашкино) ферма каравылчысы Николай Романовский урманда капкын куйган. Икенче көнне аңа селәүсен (рысь) эләккән. Николай ерткыч хайванга аткан һәм шул вакытта аңа башка берсе һөҗүм иткән. Романовский кабат ата. Капкынга ата җәнлек эләккән, ә аучыга агачтан ана хайван сикергән. Каравылчы аларны үлчәп тә караган, атасы 38 килограмм, анасы 21 килограмм авырлыкта булган.

“Ленин юлында” – 10 декабрь, 1974 ел.

“Новый путь” колхозында (Лагерка) азык йорты янында яңа терлекчелек бинасы – 57 башка исәпләнгән дуңгыз абзары төзелгән. Яңа дуңгыз абзарында заманча җиһазлар: металл индивидуаль станоклар, автоматлаштырылган су эчергечләр һәм самокормушкалар урнаштырылган. Станокларда дуңгыз балаларын инфракызыл нурлар белән нурландыру өчен лампалар да бар.

“Ленин юлында” – 27 декабрь, 1974 ел.

“Татарстан” колхозында (Түбән Кәминкә) ел ахырына кадәр кырларга 14665 тонна ашлама чыгарылган. Бу эштә районның “Авыл хуҗалыгы техникасы” берләшмәсе механизаторлары тырышлык күрсәтәләр. Органиканы чыгару дәвам итә.

“Ленин юлында” – 28 декабрь, 1974 ел.

45 ел элек

“30 ноябрьдә безнең 9 яшьлек улыбыз Сергей урамда уйнап йөргәндә, кинәт авыл буасына барып, бозның ныклыгын сынап карарга була. Нечкә боз катламы ватылып, Сережа бозлы суга төшеп китә. Бәхеткә каршы, Күтәмә мәктәбе укучылары Радик һәм Альберт Мингатиннар якында гына булалар. Алар ярдәмгә ташланалар һәм батучыны тартып чыгаралар. Мәктәп укучыларына игелекле гамәлләре өчен чын күңелдән рәхмәт.

Семайкиннар гаиләсе.

Күтәмә авылы.”

(Редакциягә килгән хаттан.)

“Ленин юлында” – 5 декабрь, 1979 ел.

Районда 69 беренчел комсомол оешмасы бар. Алар үз сафларына ВЛКСМның 4142 әгъзасын берләштерә, алар арасында – колхозчылар, эшчеләр, хезмәткәрләр һәм укучылар.

“Ленин юлында” – 7 декабрь, 1979 ел.

“Восход” колхозында (Мордва Афонькәсе) еш кына өмәләр оештырыла. Комсомол субботникларында һәм якшәмбеләрендә җыелган акчага безнең комсомолчылар Советлар Союзы Герое Павел Алексеевич Цаплинга һәйкәл куярга ниятлиләр.

“Ленин юлында” – 14 декабрь, 1979 ел.

25 декабрьдән Әлмәт-Чирмешән автобуслары йөри башлый. Әлмәттән беренче рейс иртәнге 5 сәгать 10 минутта, икенчесе – 12 сәгать 40 минутта, Чирмешәннән беренче рейс – 9да, икенчесе 16 сәгать 30 минутта кузгалачак.

“Ленин юлында” – 21 декабрь, 1979 ел.

Яңа Кади авылына ау сезонын ачу өчен әлмәтлеләр килгән иде, ләкин ул алар өчен шул ук көнне тәмамланды. Пошига төбәп бердәнбер ату браконьерларга бик кыйммәткә төште. Дәүләт фондына китерелгән зыян өчен аларга 500 сум күләмендә дәгъва белдерелгән. Өстәвенә, дәүләт автоинспекциясе Киров исемендәге колхозның (Утыз Имән) баш агрономына һәм браконьерларның һәрберсенә 50 сум күләмендә штраф салган, өстәвенә мылтыклары да конфискацияләнгән.

“Ленин юлында” – 26 декабрь, 1974 ел.

40 ел элек

Шушы көннәрдә район хәрби комиссары М. Исмәгыйлев Әфганстанда интернациональ бурычын үтәгән Николай Семайкинга “СССР дәүләт чиген саклаудагы батырлыгы өчен” медален тапшырды. Хәзер аның I һәм II дәрәҗәдәге “Отличник погранвойск” билгеләренә тагын бер бүләк өстәлде.

“Ленин юлында” – 7 декабрь, 1984 ел.

Яңа ел алдыннан Туймәт укучылары зур бүләк алдылар – 192 укучыга исәпләнгән яңа сигезьеллык мәктәп ачылды. Фрунзе исемендәге колхозда (Әккәрәй) берьюлы берничә объект файдалануга тапшырылган: халыкка көнкүреш хезмәте күрсәтүнең кабул итү пункты, кунакханә һәм ашханә.

“Ленин юлында” – 26 декабрь, 1984 ел.

35 ел элек

1990 елда Югары Кәминкә авылында 217 кеше “Ленин юлында”, 208 кеше “Социалистик Татарстан”, 190 кеше “Татарстан яшьләре”, 127 кеше “Азат хатын” газеталарын һәм журналларын алдырачак.

“Ленин юлында” – 1 декабрь, 1989 ел.

Тукай исемендәге колхозның (Иске Кади) ферма мөдире Мингаяз Хөснелгатинның һәм аның авыру әнисенең шатлыклары зур: алар яңа колхоз фатирына күчәләр. Моңа кадәр терлекчеләр Мөзәянә һәм Җәүдәт Әхмәтҗановлар, Мәдинә һәм Сәгыйть Фәттаховлар да шундый ук өй туйлары үткәргәннәр. Колхоз идарәсенең үз хезмәтчәннәре турында кайгыртуы сөендерә.

“Ленин юлында” – 9 декабрь, 1989 ел.

Төзекләндерелгән тугыз яңа фатир – мондый бүләкне АПО ремонт-техник предприятиесе эшчеләре алачак. Ремтехпредприятие бер ел эчендә дүрт ике фатирлы һәм бер бер фатирлы йорт төзеп, төзелешкә 150 мең сум акча тоткан.

“Ленин юлында” – 31 декабрь, 1989 ел.

30 ел элек

Ял көннәрендә йөзләрчә чирмешәнле себерке белән ПУЖКХ мунчасына бара. Элек мунчада юыну 20 тиен торган булса, хәзер – 500 сум.

“Безнең Чирмешән” – 3 декабрь, 1994 ел.

Узган атнада Бәркәтә мәктәбенең котельныенда көчле шартлау булды. Бинага зур зыян китерелгән, мәктәпкә җылылык бирү туктатылган, дәресләр туктатылган. Ярый әле җәрәхәтләнүчеләр юк.

“Безнең