Иске Үтәмеш мәктәбе укучылары төрле илләргә “сәяхәт кылганнар”

-Туган телләр һәм халыклар бердәмлеге елы кысаларында, укучыларга һәр көнне бер илгә “сәяхәт оештырдык”. Аларның гореф-гадәтләре, йолалары, милли үзенчәлекләре белән таныштырдык, - ди лагерь начальнигы Гөлнара Латыйпова. – Балалар район үзәгенә, табигать кочагына экскурсияләргә бардылар. Ял итүче балаларны пешекче апалары тәмле ашлар белән сыйладылар.

Иске Үтәмеш укучылары район үзәк китапханәсе эше белән дә танышканнар, аннан зур тәэсирләр белән кайтканнар, туган як тарихы музее да бик ошаган, яшьләрнең ял итү үзәгендә мультфильм караганнар. Табигать кочагына экскурсиягә баргач, безнең якларда үсүче дару үләннәре белән танышканнар, “Мәликә” чишмәсе тирәсен һәм елга буен тәртипкә китергәннәр, чүп-чарны җыеп алганнар.

Кадыйр Гомәров фотосы.