Чирмешәндә урам утлары ник соң кабына һәм иртә сүнә?

Чирмешән халкы.

Редакциягә чирмешәнлеләр мондый сорау белән еш мөрәҗәгать итәләр. Төрле социаль челтәрләрдә дә моң-зар белдерүчеләр бар. Әлеге сорауга ачыклык керү өчен без район башкарма комитеты җитәкчесенең икътисад мәсьәләләре буенча урынбасары Марат Әһлиуллинга мөрәҗәгать иттек: “Илдәге вәзгыять белән бәйле, чыгымнарны киметү һәм экономияләү максатында, район башлыгы боерыгы нигезендә урам яктырткычларының кабыну һәм сүнү графигы үзгәртелде. Элек баганалардагы утлар кич караңгы төшкәннән алып иртәнге вакытка кадәр яна иде, ә хәзер яктырткычлар төнге унберләрдә яки уникедә сүнә. Сүндерү төрле урамда төрлечә. Соңгы вакытларда район үзәгендә урамнарда  яктырткычлар чиратлап яна торган итеп тә ясалды. Халык моны аңлап кабул итсен иде.”

фото: архив