Чирмешәндә тагын бер төркем балаларны “Алдынгылар Хәрәкәте”нә кабул иттеләр
Безнең районда инде икенче төркем балаларны һәм остазларны “Алдынгылар Хәрәкәте” Бөтенроссия иҗтимагый-дәүләт балалар һәм яшьләр хәрәкәтенә багышлау чарасы булды.
Иске Кади урта мәктәбенең тәрбия эшләре буенча директор урынбасары Галия Камалова да бүгеннән “Алдынгылар” рәтендә. Ул – тантанада остазлар сафына кергән биш укытучының берсе.
- Бу безнең өчен горурлык, ул үзенә күрә җаваплылык та өсти, чөнки “алдынгы” сүзе үк һәрвакыт алда булырга чакыра. Остаз - һәр эштә балаларга үрнәк булу, үзең башлап йөрү дигәнне аңлата, - диде Галия Искәндәр кызы.
Тантанага район мәктәпләреннән укуда, төрле бәйгеләрдә, җәмәгать тормышында алдынгы булган 19 малай һәм кыз килгән. Аларны хәрәкәтнең җирле бүлекчәсе рәисе Гөлшат Җамалтдинова тәбрикләде.
- Кадерле балалар, сез инициатива, гражданлык позициясе күрсәтә, төрле проектларда катнаша аласыз. Сезнең һәр тәкъдимегез ишетелер, хыялларыгыз чынга ашар дип ышанам, - диде ул.
Балаларга һәм остазларга хәрәкәтнең билгесе булган күкрәк билгеләре һәм браслетлар тапшырылды. Алар, түгәрәкләргә җыелып, “Алдынгылар” вәгъдәсен бирделәр, хәрәкәтнең биюен башкардылар.
ФОТОРЕПОРТАЖ
Следите за самым важным и интересным в Telegram-каналеТатмедиа
Нет комментариев