Һәлакәткә юлыккан автобусның йөртүчесе йоклап киткән булырга мөмкин

Бүген иртән Нижегород өлкәсендә Казаннан Санкт-Петербургка балалар алып баручы автобус һәлакәткә юлыга. Анда ярышка баручы Казан балалары булган. 3 кеше үлгән.

Беренчел фаразлар буенча, автобусның 51 яшьлек йөртүчесе каршы як хәрәкәт полосасына чыккан. Бу хакта өлкәнең ЮХИДИ идарәсе хезмәткәрләре җиткергән. Һәлакәт аркасында өч кеше һәлак булган: бер кыз бала (12-13 яшьләр тирәсендә) һәм ике олы кеше. Автобус "МAN" йөк машинасына бәрелгән. Автобуста 12 бала, 6 озата баручы һәм 2 йөртүче булган. Һәлакәт урынына ярдәмгә 62 кеше һәм 21 техника, шул исәптән Россия Гадәттән тыш хәлләр министрлыгыннан 18 кеше, 4 берәмлек техника җәлеп ителгән.