Чирмешәнлеләргә юлларда сак булырга киңәш итәләр

- Илнур Минсәгыйтович, һава шартларының үзгәрү үзенчәлекләрен исәпкә алып, елның бу вакытында автомобильчеләр ничек йөрергә тиеш?

- Чыннан да, соңгы көннәрдә кар күп яуды. Бу чорда машина йөртүчеләр юлга техник яктан төзек автомобильдә генә чыгарга тиеш, тормоз системасының, руль идарәсе һәм фараларның төзеклегенә аерым игътибар бирергә тиеш. Хәрәкәт тизлеген, бигрәк тә тайгак юлда, машиналар күплеген, юл шартларын, күз күремен исәпкә алып сайларга кирәк. Башка транспорт чараларына карата дистанцияне арттыру мөһим. Җәяүлеләр юлга чыкканда, кискен тавыш һәм яктылык сигналлары бирмәгез, чөнки кеше, юлдан чыгарга ашыгып, таеп, автомобиль алдына егылырга мөмкин. Автомобильләрнең еш йөрүе аркасында аеруча тайгак булган җәмәгать транспорты тукталышларын һәм юл киселешләрен узганда сак булыгыз. Онытмагыз, кышкы чорда көн кыскарак, шуңа күрә фаралар куллану кирәк. Юл хәрәкәте кагыйдәләрен төгәл үтәгез, куркынычсызлык каешын тагарга онытмагыз, автомобиль белән яңгыр һәм кар яуганда хәрәкәт иткәндә, күз күременең начараюын истә тотарга кирәк, чөнки пыяла чистарткычлар алгы пыяланың бер өлешен генә чистарта. Тайгак юлда хәрәкәтнең куркынычсызлыгы үзегездән дә тора.

- Һәм, әлбәттә, юл хәрәкәтендә катнашучыларның тагын бер категориясе – җәяүлеләр. Аларга да кышкы чорда аеруча игътибарлы булырга туры килә. Җәяүлеләргә нәрсә киңәш итә аласыз?

- Һава торышы начараю сәбәпле игътибарлы һәм сак булырга кирәк. Кар һәм яңгыр тамчылары, автомобильнең алгы пыяласында калып, күз күремен шактый киметә. Җәяүлеләр дә мондый һава торышында капюшоннар кияләр, якалар белән капланалар, бу аларның күрү һәм ишетү сәләтен киметә. Нәтиҗәдә, җәяүлеләрнең авариягә эләгү куркынычы тагын да арта. Тротуардан юлга төшәр алдыннан җәяүлегә аеруча игътибар белән карарга һәм якын-тирәдә хәрәкәт итүче транспортның булмавын тикшерергә кирәк. Беренче бозлавык шартларында урамны аркылы чыкканда икеләтә сак булыгыз. Светофорның яшел сигналын кабызганнан соң да, якынлашып килүче транспортның тулысынча туктавына инанмыйча, хәрәкәтне башламагыз. Шофер бозлы юлда машинаның тормоз юлын дөрес исәпләмәскә һәм җәяүлеләр үтүенә чыгарга мөмкин.

Хәзер караңгыда хәрәкәт итәргә туры килгән җәяүлеләргә яктылык кайтара торган элементлы кием кияргә киңәш ителә, алар якты итекараңгыда ялтырыйлар, нәтиҗәдә, җәяүленең юлын куркынычсызрак итәләр. Ләкин чынлыкта барысы да диярлек бу киңәшләрне санга сукмый. Ә бит караңгыда, урамда фонарьлар янса да, җәяүле шоферлар өчен юл начар күренә.

Марат Гомәров фотосы