Чирмешәндә питбайк белән идарә иткән егетне бәрдергәннәр

Юл-транспорт һәлакәте район үзгендәге христиан зираты тирәсендә, “Кольцо”да була. Титов урамыннан К.Маркс урамына таба борылучы җиңел автомобиль төп юлдан килүче мини-мотоциклга юл бирми һәм аңа килеп бәрелә. Билгеле, мондый очракта автомобиль йөртүче гаепле. Ләкин...

-Питбайк белән идарә итүче егетнең йөртү таныклыгы да, транспорт чарасы белән идарә итү тәҗрибәсе дә юк, - ди район ЮХИДИ бүләкчәсенең административ законнарны үтәү буенча инспекторы Сергей Барабашкин. – Кызганыч, күпме сөйләсәк тә, кисәтсәк тә, әти-әниләр балаларга әлеге техниканы алып бирәләр, йөрергә рөхсәт итәләр.

 

Питбайк - мотоциклның бер төре, ул спорт чаралары өчен каралган техника, спорт инвентаре. Аның белән гомуми юлларга чыгарга ярамый, асфальтлы юлмы ул, асфальтсызмы, тыкрыкмы – рөхсәт юк. Бу техникада хәрәкәт итү махсус, тиешле таләпләргә туры килә торган урыннарда гына ярый. Шулай ук гироскутер, сегвей, моноколеса, самокат – болар белән дә олы юлга чыгарга ярамый.  Юлда йөрү кагыйдәләре буенча, андый техникаларда хәрәкәт итүчеләр җәяүлеләр өчен булган юл кагыйдәләренә буйсыналар, алар – җәяүле. Әйтик, юл аша чыкканда, җайланмаларыннан төшеп, алар юл аркылы җәяүлеләр кичүеннән җәяүләп чыгарга тиеш.

Фото: Сергей Барабашкин.