Чирмешәндә “Каршы юл” операциясе башланды

Юлларда контрольне көчәйтү борчулы статистика белән бәйле. Дәүләт автоинспекциясенең оператив мәгълүматларына караганда, 2026 елның җиде аенда республикада каршы як полосага чыгу белән бәйле 112 юл-транспорт казасы теркәлгән. Әлеге һәлакәтләрдә 58 кеше үлгән, тагын 172 кеше төрле дәрәҗәдәге имгәнүләр алган. Безнең район автоинспекторлары исә каршы як хәрәкәт полосасына чыгу белән бәйле 121 хокук бозу очрагын ачыклаганнар.

Юл-транспорт һәлакәтләрендә һәлак булучыларның 31,7 проценты шушы сәбәп буенча үлә.

• Каршы як полосасына чыгу – юл хәрәкәте кагыйдәләрен бозуның иң авырларының берсе. Узып китәр алдыннан машина йөртүче каршы як полосасының маневр өчен җитәрлек ераклыкта буш булуына һәм аның юл хәрәкәтендә катнашучылар өчен куркыныч тудырмаячагына инанырга тиеш. Әлеге маневр «узып китү тыела» билгесе гамәлдә булган зонада, юлда тоташ линия булганда, куркыныч борылышларда, таулы якка күтәрелү азагында, шулай ук күрү мөмкинлеге чикләнгән участокларда катгый тыела.

Әлеге таләпләрне бозган өчен җитди җаваплылык каралган. Машина йөртүчегә 7 500 сум күләмендә административ штраф яки дүрт айдан алты айга кадәр транспорт чарасы белән идарә итү хокукыннан мәхрүм итү яный. Кабат хокук бозган очракта җәза катгыйлана – бер елга транспорт чарасы белән идарә итү хокукыннан мәхрүм итү каралган.

Хокук бозу инде шундый ук гамәл өчен хокукларыннан мәхрүм ителгән зат тарафыннан кылынган аерым очракларда яки хөкем ителгән очракта җинаять җаваплылыгы да каралган – өч елга кадәр иректән мәхрүм итү.