Чирмешәндә каршы як полосасына чыгу кагыйдәсен бозуның 106 факты ачыкланган

Аның максаты гади, әмма бик мөһим – машина йөртүчеләрне юлдагы иң хәвефле маневрларның берсе булган каршы як полосасына чыгу очракларыннан кисәтү. Монда сүз штрафлар турында гына түгел, ә уйландырырлык статистика турында бара.

2026 елның беренче яртыеллыгында республика буенча саннар бик аяныч: автомашиналарның кара-каршы бәрелешүнең 98 очрагы теркәлгән, 49 кеше һәлак булган, 156 кеше җәрәхәтләнгән. Юллардагы үлем очракларының өчтән бере (төгәлрәге – 35 проценты) нәкъ менә каршы як полосасына чыгу аркасында килеп чыккан. Бер ялгыш адым, бер мизгел – һәм тормыш «моңа кадәргегә» һәм «аннан соң» гыга бүленә.

Бу уңайдан без Чирмешән районы Дәүләт автоинспекциясе бүлеге җитәкчесе Радик Рафаил улы Сәйфетдинов белән сөйләштек.

– Радик Рафаилевич улы, бу проблема безнең Чирмешән районы өчен никадәр кискен?

– Ни кызганыч, нәкъ шулай. Быелның беренче алты аенда гына да инспекторларыбыз каршы як хәрәкәт полосасына чыгуның 106 очрагын теркәде. Безнең район өчен бу бик зур сан. Болар бит– без ачыклаган очраклар гына. Аларның ничәсе фаҗига белән тәмамланырга мөмкин булганын күз алдына китерү дә куркыныч. Безнең максат кешеләрне акча, штрафлар белән җәзалау түгел. Без һәр йөртүченең тыелган урында каршы як полосасына чыгып, ул үз гомерен дә, башкаларның гомерен дә зур куркыныч астына куын аңлавын телибез.

– Безнең район йөртүчеләре нинди кагыйдәләрне ешрак боза?

– Иң киң таралган ялгыш уй – «өлгерәм әле». Күпләр юл арасын, аның торышын яки каршыга килүче транспортның тизлеген дөрес бәяләми. Куркыныч борылышларда, үргә күтәрелеш ахырында, шулай ук тоташ сызык сызылган яки «Узып китү тыела» билгесе куелган урыннарда узу катгый тыелуын оныталар. Маневр башлар алдыннан каршы як полосасының җитәрлек ераклыкта буш булуына һәм юл хәрәкәтендә башка катнашучыларга комачауламавыгызга берничә тапкыр инанырга кирәк.

– Мондый хокук бозу өчен нинди җаваплылык каралган?

– Шуны әйтәсем килә: җиңел генә котылып булмаячак. Каршы як полосасына законсыз чыккан өчен 7 500 сум штраф яки 4 айдан 6 айга кадәр транспорт чарасы белән идарә итү хокукыннан мәхрүм итү каралган. Әгәр бу хокук бозу кабатланса, йөртүче бер елга йөртү таныклыгыннан мәхрүм калачак. Ә инде мондый гамәл нәтиҗәсендә кешеләр зыян күрсә, һәм моңа охшаш җинаять өчен элек тә хөкем ителгән булсагыз, җаваплылык җинаять җаваплылыгына үзгәрергә мөмкин – өч елга кадәр иректән мәхрүм итү каралган. Әмма бу да иң куркынычы түгел. Иң авыры – һәлак булган кешеләрнең якыннары күзенә карау.

– «Каршы як полосасы» рейды алдыннан укучыларыбызга нәрсә әйтер идегез?

– Руль артындагы һәркемгә – яшь йөртүчеләргә дә, күпьеллык тәҗрибәсе булганнарга да мөрәҗәгать итәм. Юл ашыгуны кичерми. Сәфәрләрегезне ашыкмаслык итеп планлаштырыгыз. Онытмагыз: сез үз гомерегез өчен генә түгел, пассажирларыгыз һәм каршыга килүче кешеләрнең гомере өчен дә җаваплы. Татарстан Дәүләт автоинспекциясе юл хәрәкәте кагыйдәләрен төгәл үтәүне таләп итә. Мин исә сездән тәртипле генә түгел, игътибарлы һәм кешелекле булуыгызны сорыйм. Бөтенләй барып җитмәгәнче, биш минутка соңрак барып җитү яхшырак.

Юлларда сак булыгыз! «Каршы як полосасы» профилактик чарасы 28 июльгә кадәр дәвам итәчәк. Үзегезне һәм якыннарыгызны саклагыз!

Марат Гомәров фотосы