Кыш бабай Әккәрәйдә хоккей ярышы уздырган

Әлеге авыл яныннан агучы Кече Сөлчә елгасы боз өсте кышкы каникул көннәрендә хоккей уйнаучы, тимераякта шуучы бала-чага тавышыннан тынмый. Ә бер көнне бирегә Кыш бабай белән Кар кызы да килделәр.

Алар елганың уң ягында һәм сул ягында яшәүче авыл балаларын - "Турикас" һәм "Лешайки" хоккей командаларын ярыштырдылар. Кыш бабай - авыл эшмәкәре Михаил Кваков капчыгында яшь хоккейчыларга дигән күчтәнәчләр: сникерслар, тәм-томнар һәм фейерверк әзерләнгән. Ә уен "Турикас" файдасына - 6:4 исәбе белән тәмамланды.

-Шунысы сөендерә, авылыбыз балалары каникулларын телевизор каршында гына үткәрми. Әгәр кар яуса, көрәк, себеркеләр белән боз өстен ялтыратып кына торалар. Аннан шунда тирләп-пешеп, кызырып уйнап кайталар, - ди Кыш бабайны ярышка дәшкән Әккәрәй мәдәният йорты директоры Лидия Квакова.

Лидия Квакова фотолары