Чирмешән “ябалаклары” музыкаль үзәкле булды

"Шешмаойл" җәмгыяте призына яшүсмерләр арасында узган хоккей турнирында Чирмешәннең "Корыч ябалаклар" уенчысы Азат Җиһаншин "Иң яхшы сакчы" буларак танылды. Ә командага исә музыкаль үзәк бүләк иттеләр.

Район үзәгендәге "Юбилейный" боз сараенда дүрт көн барган ярышларның әүвәлге ике көнендә бозда 7-8 яшьлек малайлар көч сынашты. Монысында җиңү бәхете безнең спортчыларны (тренер Руслан Маковей) урап узды, яшь "ябалаклар" дүртенче урынга гына чыга алды.

Ә менә 9-10 яшьлекләр арасындагы ярышларда "Корыч ябалаклар" (тренер Рамил Баһаветдинов) тулысынча өстенлеккә ия иде, алар - җиңүче. Җәлилдән "Торнадо" - икенче, Бөгелмә "Арыслан"нары өченче урында. Азат Җиһаншинны да шундагы уеннар нәтиҗәләре буенча бүләкләделәр. Бүләк дигәннән, иганәче - "Шешмаойл" турнирда катнашкан һәр уенчыга кечкенә генә булса да сувенир әзерләгән. Ә җиңүче командалар музыкаль үзәккә ия, икенче урын алучыларга - электр чәйнеге (термопот), өченче урынга мультиварка насыйп булды. Иганәчедән кубок, медальләрне дә малайлар турнир истәлеге итеп сакларлар.