Аспирин битне чистарта

Аспирин – тән температурасын төшерә, шул ук вакытта менә дигән косметика чарасы да! Ас­пирин катнашындагы маскалар тән тиресен чистартырга, аны сафландырырга ярдәм итәр. Ас­пирин ялкынсынуларны кисә­тә, дәвалау үзлекләренә ия. Бит­тәге тишекләрне бетерә, май бүленү процессын җайлый, тән­не чис­тарта. Аспириннан ясалган мас­калар битне йогышсызландыра.
Маска өчен тышчасы булмаган гап-гади аспирин кирәк булачак. Әмма эшкә керешер алдыннан шунысына игътибар итегез: аспирин кайберәүләрдә аллергия китереп чыгарырга мөмкин, ә йөкле һәм имезүче хатын-кызларга  андый маскалар тыелган. Шулай ук битендә җәрәхәте булганнарга да сабыр итеп торырга кирәк.

1 ысул. Катнаш яки майлы тирене чистарту өчен 4 аспирин төймәсе алына, ваклана, шуңа 1 чәй кашыгы үсемлек мае яисә җылытылган бал һәм 1 аш кашыгы су салына. Масканы биткә сөртеп, җиңелчә массаж ясап алырга кирәк. 10 минуттан җы­лымса су белән юып алыгыз.

2 ысул. 6 төймәне вакларга, шуңа 2 аш кашыгы лимон согы кушарга. Яхшылап болгатырга – артык куе  килеп чыкмасын. Битне, маска сөртер алдыннан, яхшылап чистартырга. Масканы 10 минут тотарга. Аны 1 аш кашыгы содага 1 литр су кушылып ясалган төнәтмә белән юып төше­рергә кирәк. Мондый маска битне бетчәләрдән чистартыр, төсен тигезләр, тәнне агартып җибәрер.
3 ысул. Нормаль бит тиресе өчен түбәндәге масканы ясагыз: 2 төймәне изәргә, шуңа 2 аш кашыгы кефир яки йогурт кушарга. Масканы 20-30 минут тотарга кирәк.

Чыганак: (“Ватаным Татарстан”,   /№ 81, 06.06.2014/) http://www.vatantat.ru/

pixabay.com