«Халык инспекторы» уңышлары

Юл хәрәкәте кагыйдәләрен бозу турындагы хәбәрләр өчен 200 мең сумнан артык акча түләнгән инде. «Татар-информ» кушымтада акчаны нәрсә өчен алырга мөмкин булуын искәртә.

«Юл хәрәкәте кагыйдәләрен бозу турындагы хәбәрләр өчен 200 мең сумнан артык акча түләнгән»

Татарстанда «Халык инспекторы» кушымтасының яңартылган версиясен эшләтеп җибәргәннән соң, ярты ел эчендә аны инде 70 мең тапкыр йөкләп алганнар. Юл хәрәкәте кагыйдәләрен бозу турындагы хәбәрләр өчен бүләкләү системасы кертелгәннән бирле кушымтадан файдаланучыларга 450дән артык түләү җибәрелгән. Яңарту, үзенең актуальлеген исбатлады һәм күп кенә яңа кулланучыларны җәлеп итте, дип сөйләделәр Татарстан Дәүләт автоинспекциясендә.

«Бүгенгә, яңартылган версия ярты ел эшләгәч, безгә 8 267 гариза бирелде, бу бары тик түләүле категорияләр буенча гына. Бүгенге көндә безнең кулланучыларга 200 мең сумнан артык акча түләнгән. Бүләкләүгә гаризалар барлык гаризаларның якынча 10 процентын алып тора», – дип сөйләде Татарстан Республикасы дәүләт идарәсенең Цифрлы үсеш, мәгълүмати технологияләр һәм элемтә министрының беренче урынбасары Илья Начвин.

«Татар-информ» «Халык инспекторы» кушымтасында җиде түләүле категория булуын сөйләгән иде. Искәртеп үтик, битараф булмаган гражданнар нәрсә өчен акчалата бүләк алырга мөмкин:

• әйләнә-тирә мохитнең пычрануына шаһит булсалар, нәкъ менә автомобильләрдән җитештерү калдыкларын бушату яки агызу, бу хокук бозу видеосы өчен 1 150 сум алырга мөмкин;
• иминлек каешын эләктермәгән машина йөртүче яки мотошлем кимәгән мотоциклчыны видеога төшергән өчен – 300 сум;
• светофорның тыелган утына яки регулировщикның тыю турындагы ишарәсенә чыгуны видеога теркәгән өчен – 300 сум;
• стоп-линия алдыннан яки светофорның тыелган сигналы алдыннан туктау таләбен бозу видеосы өчен – 230 сум;
• каршы як хәрәкәт полосасына яки каршы як юнәлештәге трамвай юлларына чыгу видеосы өчен – 1 140 сум.
• Хәрәкәттә җәяүлегә өстенлек бирмәүне видеога төшергән өчен – 435 сум;
• Хәрәкәт вакытында йөртүченең рульдә килеш телефон куллануын видеога төшергән өчен – 435 сум.

Кушымтаның эш рәвеше мондый – аны ачуга ук камера кушыла, бу хокук бозуны шундук төшерергә ярдәм итә. Шуннан соң гариза тутыру, шул исәптән алда күрсәтелгән җиде категориянең берсе буенча мөрәҗәгать иткәндә, акчаны кая күчерү турында пунктларны тутыру этабы була.

«Хәзер Казан үзәгендә һәм тулаем шәһәр буенча, элемтә белән һәм геопозицияне билгеләү белән проблемалар килеп чыга. «Халык инспекторы» кушымтасында мондый проблемалар булмый, чөнки адресны кулдан язарга яки үзлектән картада геонокта куярга була», – дип сөйләде Илья Начвин.

Тик сер түгел, һәр штрафны шикаять итәргә була. Судка мөрәҗәгать итеп, үзеңнең хаклы булуыңны расларга кирәк, шул вакытта суд штрафны кире кагарга һәм аны түләмәскә мөмкин. Бу очракта нишләргә? Хокук бозучы штрафын түләсә дә, түләмәсә дә, бу хакта хәбәр иткән кешегә акча барыбер түләнә.

«Административ хокук бозу турында карар чыгарылгач кына, түләү җибәрелә. Алга таба, нәрсә булуына карамастан, штрафны түлиләрме, әллә кире кагалармы, мөрәҗәгать итүче акчасын барыбер ала», – дип сөйләде Илья Начвин.

«Сезнең аңлы булуыгыз – имин юл җәмәгатьчелеге булдыруга керткән өлеш»

«Халык инспекторы» эшләгән дәвердә – ун ел эчендә – аны 300 меңнән күбрәк йөкләп алганнар. «Халык инспекторы» дәүләт системасы 2014 елда кулланылышка керде. Ул аңлы гражданнар юл хәрәкәте кагыйдәләрен бозуларны күреп, аларны теркәп системага мәгълүмат җибәрсен өчен эшләнгән.

Модераторлар килгән мәгълүматны аралый, ә соңыннан хокук бозулар турында мәгълүматны Дәүләт автомобиль инспекциясенә җибәрә, анда аларны өйрәнәләр, әгәр чыннан да хокук бозу булган икән, гаепле кешегә штраф салына. Кушымта «Белешмәләр икътисады һәм дәүләтнең цифрлы үсеш-үзгәреше» илкүләм проекты кысаларында тормышка ашырыла.

«Халык инспекторы» кушымтасындагы 21 категориянең җидесе түләнә. Алар буенча мөрәҗәгать итүчегә хокук бозучыга язылачак штрафның 25 проценты күләмендә түләячәкләр», – дип сөйләде Илья Начвин.

Кулланучылар да, Илья Начвин үзе дә, кушымта яңартылганнан соң юлларда күпкә иминрәк булуын искәртә. Йөртүчеләр юл хәрәкәте кагыйдәләрен азрак боза башлаган – алар юллардагы камералардан һәм ГАИ хезмәткәрләреннән генә түгел, ә хәрәкәтендәге башка катнашучылардан да куркырга кирәклеген аңлый.

«Бар кешегә дә актив гражданлык позициясе өчен һәм республика юлларында иминлек һәм хокук тәртибен тәэмин итүгә битараф булмаганнары өчен рәхмәт әйтәсе килә. Сезнең уяулык юл хәрәкәтендәге барлык катнашучылар өчен күпкә иминрәк мохит тудыра. Теркәлгән һәр хокук бозу – потенциаль рәвештә фаҗига булдырмый калу, юл хәрәкәтендә катнашучыларның гомерен һәм сәламәтлеген саклау өчен шанс. Барыгызны да юл хәрәкәте кагыйдәләрен бозу турында хәбәрләр җибәрү юлы белән юл хәрәкәте иминлеген арттыруда катнашу хокукыннан файдаланырга чакырабыз. Сезнең аңлы булуыгыз – имин һәм җаваплы юл җәмәгатьчелеге булдыруга мөһим өлеш кертү», – дип сөйләделәр Татарстан Республикасы Дәүләт автоинспекциясендә.