Чирмешән районы мәктәпләрендә "Каршылыксыз мохит" программасы тормышка ашырыла

Иске Котыш һәм Утыз Имән авыллары мәктәпләрендә киләсе елда берникадәр ремонт эшләре кузгатмакчылар. Әлеге белем йортлары "Каршылыксыз мохит" программасына кергән.

Уку-укыту шартларын ансатлаштыру максатында, биналарга керү-чыгу юлларын җайлырак итәчәкләр. Баскычларга пандуслар ясау да күздә тотыла. Санитар үзел челтәрен бераз үзгәртеп яңарту, керү уңаендагы ишекләрне алмаштыру да - каршылыксыз мохит таләпләре.

Яңа елда Иске Котыш мәктәбендә - 1 миллион 800 мең, Утыз Имән мәктәбендә 2 миллион сумлык шундый эшләр башкарылырга тиеш. Район башкарма комитеты җитәкчесенең төзелеш һәм торак - коммуналь эшләр буенча урынбасары Муса Вилданов әйтүенчә, ремонтны уку елы ахырындарак - язгы якта башлау ниятләнә. Эшне яңа уку елына кадәр төгәлләргә дә кирәк.