Кызыл Яр мәчете сәдака акчаларына ремонтланган

Моңа кадәр изге йортның эчке ягында төзекләндерү эшләре башкарылган булса, сентябрь ае азагында бинаны тыштан ремонтларга керештеләр. Осталар  мәчетнең манарасын тышлап,  стеналарны да шундый яшел төстәге профнастил белән яңарттылар.

-Күптән түгел әлеге мәшәкатьләр төгәлләнде. Барысын да авылдашларның, Югары Кәминкә, Керкәле авылы халкының сәдака акчаларына эшләттек, бик зур рәхмәт ярдәм итүчеләргә. Авыл җирлеге башлыгы Мингали Минһаҗев, район мөхтәсибе Рамил Ибраһимов та изге эш өчен күп көч куйдылар, - ди авыл имамы  Зәйнулла Забиров. 

Бүген бу кечкенә авылда 40-45 кеше гомер итә. Җомгаларга - дүрт-биш, гает намазларына 30-35 кеше җыела. Кызыл Ярда мәктәп яшендәге ике бала бар: Моксиновларның кызлары һәм уллары Югары Кәминкә мәктәбенең башлангыч сыйныфларында белем алалар.

Зәйнулла Забиров фотосы.