Якты Тауда, Сәрвәровларда бар да уңып үсә

84 яшьлеген Шакирә Сибгатулла кызы Якты Тауда 19 яшеннән. Авырлыкларны күп күргән. Инде мәрхүм ире Ибраһим белән 6 бала үстергәннәр.

-Әти бик оста кеше булды, - ди Шакирә әби. -Маллар алдына кую, су салу өчен лакан-агач савыт ясаганы һаман истә. -Ул эшләгәндә без дә аның янына керәбез, агач материалны тотышып торабыз, булышабыз. Иренең дә эшкә кулы ятып торган.

Сәрваровларның уллары Ислам да 13 ел элек тормыш иптәшен әнисе туган авылдан – Иске Кадидан алып кайткан.

-Килен үзебезнең кеше, тату, килешеп яшибез, - ди Шакирә Сәрварова. -Аш-суга да бик оста, мин, кулымнан килгәнчә, бакча эшләрендә генә катнашкалыйм.

Ислам белән Галия авылда гына эшлиләр, бер кызлары бишенче сыйныфта укый.

-Күзләре сукырайгач, Иске Кадида яшәгән әни дә берничә ел бездә торды, - ди Галия.

Сәрвәровлар – эшчән гаилә. Яшьли әтисез калган Галия мәктәптә укыганда ук сыер сауган. Әле дә өч сыерны, аппаратсыз-нисез, минутлар эчендә савып өлгерә. Ике тана, өч бозау көрәйтәләр, фураждан кала, башка азыкны сатып алмыйлар, үзләре үстерәләр. Кабак, чөгендер быел да машина-машина туларлык җыелган. Күбебез бәрәңге уңмады, дибез, ә Сәрвәровлар аны бер участоктан 250 чиләк алганнар.

-Ят орлык иде, үзебезнекеләр дә яхшы үсте, -ди Галия. -Иртәрәк килсәгез, 7 күркәбезне, 50 бройлерны да күрер идегез, аларны суйдык, урнаштырдык инде.

фото: автор